عشرة اشياء لا تقم بفعلها على الفيسبوك

تنويه اعدت كتابة هذه المشاركة على مدونة اخرى لانه الموضوع ما اله علاقة بصرت مهندس حاسوب,,,,
 يمكنكم الاطلاع عليها من هنا اضغط على التالي:
المشاركة الجديدة المعدلة عشرون شيئا تجنب فعله على الفيسبوك

كل الاحترام لكل شخص قرا و علق لن احذف هذه المدونة لانني اود الاحتفاظ بتعليقاتكم عليها :)
شكرا

مقالتي هذه هامة جدا جدا جدا تلزم اي شخص لديه حساب على الفيسبوك

 !! - أو عالقليلة أنا هيك شايفتها :] -

صحيح عنوان المقالة (عشرة اشياء لا تقم بفعلها على الفيسبوك) بس المحتوى بتمحمور على هاد العنوان (أنا فيسبوكي بس بشغل مخي! )

رح أدخل بالموضوع عطول بس بالأول شوفولي هالاحصائيات : 

Take a look please 

حسب مركز الاحصاء الفلسطيني : أكثر من نصف الشباب الفلسطيني يمتلكون اجهزة حاسوب و متصلون بالانترنت. 

شعب فلسطين على فيس بوك أكثر من الصين كيف؟ -كملوا قراءة هون الله بعينكم- فلسطين بالمرتبة ال 81 على العالم بعدد مستخدمي الفيسبوكو العاشرة على مستوى الوطن العربي ب 1.04مليون مستخدم من اصل 4.29 مليون نسمة هم إجمالي عدد سكان غزة والضفة حسب جهاز الإحصاء المركزي الفلسطيني منتصف 2012م، أي بنسبة 24.24% بينما النسبة بالصين تقريبا %0.04  وذلك لأن النظام الشيوعي في الصين يحظر استخدام فيس بوك في البلاد. ومن الملاحظ: أن في فلسطين توجد أعلى نسبة مستخدمين لفيس بوك مقارنة بعدد السكان على مستوى العالم العربي!!

*أوك تمام شو بخاطر الضيف؟ أه و انتي شو ناقص عليكي؟ شو الموضوع؟ -_- كملوا معي بالله :

يا جماعة بنقدر نقول انه نسبة كثيرة من البني آدميين الفلسطينيين على الفيسبوك وفي نسبة كبيرة و كبيرة جدا بتستخدمه غلط و من واجب الناس اللي عندها وعي و علم و شوية ثقافة تبلش توعي و تعلم غيرها عن كيفية الاستخدام الصحيح... هاد واجب كل واحد فينا  عفكرة و أنا قررت انه من واجبي أوعي الناس بهالموضوع و انت من واجبك توعيهم اوعلىالاقل تنشرلهم هالمقال ... انا لسه ما بلشت هلا رح نحكي عن بعض الامثلة اللي اذا كنت بتعملها معناها انت عالفيس بس ما بتشغل مخك !!! كملوا معي شوي 

أمور لا تقم بفعلها على الفيسبوك أبدا

!!!!Never Ever Do This Like Ever !!!!

1-  هناك فرق بين زر Like و زر Share يعني في فرق بين زر الاعجاب و زر النشر : يعني و انت قاعد بتتصفح بصفحتك الرئيسية عالفيس مش كل شي بيعجبك تعمله نشر مش صح تنشر عشرين بوست خلال دقيقة مش صح أبدا !!! اليك مقياس صغير اذا نشرت اكتر من بوستين خلال 30 دقيقة بتكون بتعمل باشي غلط لانه هيك بتزعج غيرك عدا على انه بلزمك تقرا و تتاكد من اللي بتنشر فيه!! مش اي معلومة بتعجبك لازم تنشرها لانه ممكن ما تعجب غيرك رح تقلي انا حر صحيح انت حر بس  يا اخي اذا عاجبتك اعمل لايك مش ضروري الف شير بالجلسة !

2- اشي تاني و هو بتعبلي نفسيتي لدرجة :

يا اخوي يا اختي يا حبيبتي يا قرابتي اوعك اوعك اوعك تعلق على شي او تنشر شي لانه الادمن كاتب "اعمل لايك نصرة لدينك او لرسولك او لوطنك او للشهيد او لابصر مين" .... اذا دخلت بهالموضوع مش رح اطلع بس يا أعزائي  فلتعلموا انه اللي بطلب منك او بستحلفك تعمل اشي عشان دينك هاد الشخص بيكون بدون دين وعلفكرة هاد الشي منتشر بكل الاديان مسلمين و مسيحيين وكلو... بحطو بوست وبقولوا كم لايك على صورة الله؟ .... استغفر الله العظيم :( :"(  .. يا ابنائي ربنا أكبر من هيك و الدين اكبر من هيك كيف بيطلع معكم تحصروا الدين بلايك وكومنت !!!!! الدين أرقى و أسمى و اجل من هيك 

3- لطفا شغل مخك وانت بتشوف بوستات البطاطا اللي مكتوب عليها محمد او البندورة اللي مرسوم فيها صليب !!! هاد مش معجزة ... ومش هاد الدليل اللي بتتبعه حضرتك عشان تلتزم بدين معين .. الرحمة!!! -عفوا الناس اللي لساها بتنشر الصور هاي انا شخصيا بحس انه نسبة ذكائها منخفضة حتى لو كانوا دارسين علم ذرة!

4- تعملش طلب صداقة لحد وبعدين تقرفه بطلبات عشان يلعب معك أي لعبة ...لانه امر مزعج جدا ومقيت وممل -وجد بطلوها هالعادة- !!!

5- ما تستخدمش بروفايلك الشخصي كصفحة فيسبوكية يعني أنا بتوقع من صفحتك او بروفايلك يعبر عنك و عن افكارك بشكل عام... فما تستخدم هالصفحة زي الادمنز الهبايل بالصفحات التانية يعني ما تزليليش صورة فستان وتكتبي جنبها اذا حلو لايك واذا كومنت تعليق !!! 

6-برضه ما تروح تسرق بوست من صفحة فيها تلات ملايين معجب ومنزلته هلا وتيجي حضرتك تحطيه باسمك! .. مثلا صفحة مشهورة منزلة بوست و صورة من دقيقة حضرتك بتروح بتحفظ الصورة و بعدين بترجع ترفعها وبتحط نفس التعليق عليها ... و الله انا عنك بتغلب اشي بغلب صراحة بتخزنها وبترد ترفعها طيب اعملها شير!! عادي اذا عملت شير مرة كل ساعة عفكرة

 - هذا لا يتناقض من نقطة رقم واحد-

7- تعملش نشر لاي مشاركة صارلها الف سنة متداولة على الفيس زهقنا جد زهقنا ... اقلك سر انزل على المكتبة واشتري كتاب للرافعي او لمحمود درويش او لمصطفى محمود وطول اقتباسات جديدة منه بصير وضعك الف الف :) يعني بتبين مثقف مش سراق :)

8- التطبيقات وما ادراك ما التطبيقات؟ تطبيق سنن و ذكر وتطبيق حكم و اقوال مأثورةو ..و ...  بتعرفوا شو اسوا شي فيه؟ - انه بنشر عنك اشياء انت نفسك بتشوفهاش! يمّا كل ما اتذكر انه بنت قالتلي :" آية انا بعد ما اشتركت بالتطبيق حاسة اني لو اموت ضميري رح يكون مرتاح لانه التطبيق بنزل عني قران و احاديث  مواعظ الحمدلله " بحب اقول للي بفكر هيك ان شاء الله رح نشتغلك على مشروع روبوت يصلي عنك الصلوات الخمس وبعد ما تموتي ان شاء الله رح نضل نحطله بطاريات :)

9- أشياء ما تصدقها عالفيس وما تجربها وما تنشرها:

-الاخبار الطبية الغبية هاي لا تنشرها ... يعني اللي بقلك الموز الاسود المخمج هاد بحمي من السرطان لا تصدقوا لحتى تسال طبيب !!! على الهامش انت بتعرف قديش انت بتأذي مشاعر ناس فقدت أحبتها بمرض السرطان و انت جاي تستخف بعقولنا وتقول هاي علاج !!! انت بتعرف شو جرب مريض السرطان ادوية و علاجات وطب بديل و ما كان يتعالج و بالاخر حضرتك بتجيب الوصفة السحرية تبعتك اللي لا تغني و لا تسمن من جوع!!!  شغل مخك و بكفي تأذي مشاعر غيرك و انت مش حاسس .

10- (أ) شايف لينكات "اضغط هنا واحصل على عقد عمل بدبي" ؟ او عقد عمل بالاتصالات او رحلة سفر على كندا او ابصر شو هاي فيروسات شغل مخك و تكبسش عليها 

- (ب) شايف لينكات صوّت لفلان بشكل مجاني..هاي قمة بالسخافة بتعرف ليش؟ لانه التصويت بتم من خلال تلفونك يعني من خلال شركة الاتصالات مش من خلال الفيس و عدا عن هيك القناة اللي بتكون عاملة برنامج المواهب بتجيب دعايات انه صوتوا من خلال شركاتكم الاتصالات على رقم كذا كذا وعمرها ما جابت انه صوت من خلال الفيس من خلال الرابط كذا ... شفت كيف لما تشغل مخك مش رح توقع بفخ اي فيروس؟

- (ج) لينكات فضيحة فلانة و صور علانة غالبا يا حزين بتكبس عليها و بروح بتنتشر الصورة على بروفايلك وانت بتيجي تعيط الفيس بنشر عندي اشياء غلط بدون علمي ... يا ما الفيس كشف نفسيات ههههههههه ما علينا ابعد عن هاللينكات لانها شغل فضيحة رسمي ... و ادعي يكون الك صاحب ابن حلال يقلك قيم كذا كذا من بروفايلك 

أخيرا هذه المدونة سأضيف عليها نقاط أخرى .... التدوين يياكل الوقت أكل بشكل مش طبيعي هاد ما جادت به قريحتي من كثر الاشياء المعتة اللي بشوفها الواحد فاذا عندك اية اقتراحات او افكار بتشوف انه لازم اضيفها احكيلي بتعليق او برسالة عشان اضيف على المدونة و يا رب حد يقرأ ويستفيد ونبطل ننهلك من العادات الخاطئة لمستخدمي الفيسبوك ...

شكرا :)

أنا واللينكدان - Linked!؟

ما هو اللينكد ان ؟ شو يعني لينكد ان؟ مين هاظ لينكدن؟
-سلامتك ... محدش -_- !
لا جد ... شو يعني Linked in ؟
لينكدان عبارة عن اكبر شبكة احترافية موجودة على الانترنت .. وفيها 225 مليون مشترك ...
-شو يعني؟
يعني المفروض انه من خلال الشبكة هاي تلاقي قدامك فرص متعددة في مجال العمل...
 الابسط من هيك انه من خلال شبكة لينكدان بتقدر تعمل ملف شخصي وتعرض فيه وين درست و وين توظفت و شو خبرتك وانت بشو محترف وشو مهاراتك و مميزاتك وبتقدر تحط صورتك كمان :D
هلا من خلال ترتيب وتنظيم ملفك الشخصي بيقدروا الناس يوصلولك لو قاموا بالبحث عنك!! يعني لو حد حط اسمك على جوجل ممكن يصل لصفحتك الشخصية على اللينكدان ويقدر يتعرف على معلوماتك ومميزاتك المختلفة ممكن يكون صاحب عمل وببحث عن شخص بمثل مهاراتك وخبراتك فيعرض عليك شغل ! تخيل !؟ كل شي جايز :D

كمان من خلال لينكد ان بتقدر تتواصل مع اصدقاء الك او زملاء المهنة او ناس بتشتركوا بشي معين (يعني كيف الفيسبوك بتضيف فرندز) هون بلينكد ان اسمها كوننيكت Connect  يعني صرت موصول مع هاد الشخص او هداك :)
و هيك بتصير على اطلاع باخر اخبارهم لو حد غيّر شغله او اضاف مهارات عنده او.. او... او... رح تصير تعرف تحديثاتهم لانك موصول معهم :)

كمان بامكانك تشارك بالجروبات والمجموعات الاحترافية اللي على لينكد ان ... اللي  غالبها بتناقش مواضيع مهمة وبتلاقي كتير ناس من ذوي التخصص و الاحترافية بشاركوا بهاي الجروبات .. يعني رح تحتك مع عالم خبيرة وبتفهم :D

التسجيل باللينكدان مجاني بتقدر تسجل هلا بس قبل هيك ركز معي شوي ...
أمور لا يجب ان تفعلها على اللينكد ان :
1- غالبا صورة ملفك الشخصي بتكون صورتك لانها زي ما قلنا شبكة احترافية "بروفيشنال" لو مش حابب او مش حابة تحطي صورتك عادي جدا جدا بس رجاء ابتعد عن صور الممثلين و الورد و الرومانسيات لانه مش هناك مطرحها بالمرة بالمرة !
"اقلك سر؟ بتقدر تدخل على موقع وجهي وتعمل صورة الك كرتون بتشبهك وتحطها .. افضل بميت مرة من صورة مالهاش علاقة بالدنيا :\ "
2-من خلال اللينكد ان بتقدر تنزل عبارات او مشاركات "زي اي بوست بالفيسبوك" بس رجاء قبل ما تنزل اي مشاركة فكر 3 مرات هو بينفع احط هاي هون؟ يعني بزبطش تنزل انك طالع مشوار "هاد مش تويتر ابدا" و بزبطش تنزل شي رومانسي عاطفي "مش فيسبوك ...والله" و بزبطش تنزل ادعية شعر نكت الخ الخ الخ ... محدش بمنعك تنزل اللي بدك اياه بس عشان صورتك يعني... عشانك انا بحكي هيك ما تنزل اشياء مش احترافية .. تذكر انه ناس مهمة مدراء و اصحاب شركات ممكن يصلوا الك فخليك رسمي شويتين ...

اشياء لازم تعملها:
-رتب الملف الشخصي الك يعني نزل وين بتشتغل ومثلا وصف صغير عن شغلك او عن المشروع اللي شغال عليه
-ضلك حدّث ملفك بكل جديد بمر عليك بوظيفتك المهنية
-اعمل كونيكت مع ناس بنفس مجالك او ناس بتهتم تكسب منها خبرة او شي ... انا بتواصل مع ناس بنزلوا مقالات حلوة مثلا
-اقرا المقالات المختلفة اللي بتنزل على الموقع جدا مفيدة وممتعة انا بوقت فراغي بمر عليها وبستفيد 
هلا بتقدر تشوف هاد الفيديو من خلال الرابط هاد : LinkedIn Overview 



 و عشان تسجل اذا ما كنت مسجل ادخل على الشبكة من خلال اللينك هاد :

http://www.linkedin.com


طيب ليش لازم اسجل؟؟
لانه ضروري تسجل اذا كنت بتبحث عن وظيفة و خلافه انت مطالب تعمل سيرة ذاتية صح؟ مهو اساسا اللينكدان باي ديفولت بيكون عارض السيرة الذاتية تبعتك و اشياء تانية اكتر عنك... ومرات اصحاب الشركات ببحثوا عن بروفايلك على لينكدان قبل ما يقرروا يوظفوك... بالمختصر اذا كنت دارس اي تخصص لازم يكون عندك حساب على لينكد ان ولازم تضلك تحدثه ... هيك بيعطي انطباع جيد عنك وعن مسيرتك المهنية المشرقة :D :D :D

كل التوفيق
بامكانكم التواصل معي على لينكد ان
Ayah Soufan

مهندس حاسوب عاطل عن العمل

بداية أقدم أسمى باقات التهنئة والتبريك للخريجين الجدد :) ها انتم تحصدون ثمر ما زرعتموه طوال السنوات السابقة .. الف مبارك ...

بعد كتابتي للتدوينة الأولى سُررت جداً عندما وصلت مدونتي لأشخاص ليسوا مهنسدي حاسوب ومع ذلك بادروا بمراجعتي وسؤالي بعض الاسئلة , سعدت بذلك جدا :)).... 

أما عن تدوينتي الثانية فستجدون فيها اجابات عن هذه الاسئلة :

1-ما هي النصائح الواجب اتباعها عند ارسال سيرتي الذاتية للشركات؟

2-تخرجت ولم اجد وظيفة الى الان, هل يجدر بي أن أقلق لا سيما انه هناك زملاء لي قد توظفوا ؟

3- هل بالضرورة يجب ان يكون لدي واسطة حتى أجد عملا؟

4-كنت أنتظر يوم تخرجي بفارغ الصبر والان لا اشعر بسعادة بل انني حزين جدا!

5-اذا عرض عليي أكتر من فرصة عمل كيف لي أن احدد من الافضل ؟


*استكمالا للنصائح الخاصة بالتحضير للمقابلة هناك ملحوظة مهمة يجب أن تؤخذ بعين الاعتبار ...عزيزي المهندس عزيزتي المهندسة حديثي التخرج عندما  تقومون بارسال سيرتكم الذاتية عبر البريد الالكتروني لا بد ان تحتوي رسالتكم على نص الرسالة (لا تقم ابدا بارسال سيرتك الذاتية كمرفقات بدون اي نص للرسالة) اذا قمت بذلك فهذه مصيبة كبيرة! لا بد أن تظهر بعض الاحترام للشركة التي تنوي التقديم لها ... ملاحظة أخرى يفضل جدا أن تكون سيرتكم الذاتية من نوع "بي دي اف" أنتم غير معنين بارسالها بفورمات آخر بحيث يمكن لاي شخص الحصول عليها وتعديل بيانتها صيغة PDF ممتازة جدا ... الان اليكم مثال عن نص رسالة قمت بارسالها لاحدى الشركات ...

**الآن أنتقل بكم لنقطة حساسة جدا.. يعاني اغلب الخريجين من مشاعر متضاربة عندما يرون ان زملائهم قد باشروا وظائفهم بشركات مختلفة وهم لم يجدوا وظيفة مناسبة بعد ... في هذه المرحلة قد يشعر الخريج بعدم الثقة و بالتشاؤم وغيرها من المشاعر السلبية سيما عندما يشاهد بعض من زملائه "المهملين" غير المجتهدين قد توظفوا بشركات مرموقة!! ... هنا تذكروا اعزائي الخريجين ان الارزاق بيد الله سبحانه وتعالى "و في السماء رزقكم وما توعدون" كل ما هنالك يجب ان لا تستعجلوا وان لا تفقدوا الأمل ... أنا تخرجت في 22\5 وتوظفت في 10\6 و أصدقكم القول ان هذه الفترة القصيرة لم تكن سهلة أبدا لكنني الان اعلم انني كنت عجولة وغير صبورة ابدا بدون اي داعي لذلك ...لذلك اذا تاخرت في الحصول على الوظيفة لا تفقد الامل بتاتا.. هناك من حصلوا على ظائف بسرعة البرق لكنهم لم يرتاحوا ابدا وقاموا بتغيير أماكن عملهم هناك من صبر ونال وظيفة رائعة!

*** بالنسبة للواسطة فمن وجهة نظر شخصية جدا انا اعتقد انه في تخصصنا نحن بالذات ليش من الضروري ان يكون لديك واسطة حتى تتوظف فلتترك كلام الناس المحبط والمثبط ... في مجالنا دماغك و شخصيتك ومعرفتك هو واسطتك.. غالبا سوف تتوظف بشركة والشركات يهمها ان توظف كفاءات ...( سأخبركم سرا: اذا قمت بعمل مقابلة عند شركة ما وكانت اسئلة المقابلة كالتالي عرفنا عن نفسك.. ماذا تفعل بالحياة.. ما هي انشطتك الاخرى.. لو طلب منك التاخر بالعمل هل لديك اعتراض.. وكم تتوقع راتبك.. اذا لم يتم سؤالك اسئلة تقنية ولم تشعر ان لجنة المقابلة مهتمة للتعرف على مدى ذكائك و قدرتك على الفهم و التحليل  ومدى قوتك بمجال تخصصك..  فتلعلم عزيزي ان هذه الوظيفة ذاهبة لاحدهم ممن لديه واسطة !!) فرصة سعيدة :P

****بعد مرور خمس سنوات قضيتها في أروقة الجامعة ومختبرات القسم مع أصدقائك ... بعد مروركم سويا بلحظات الفرح و المرح ولحظات التوتر والحزن الامتحانات والمشاريع و الواجبات و غيره وغيره ... الان وبعد ان قلت داعا لتلك الايام لا بد وان تشعر انك فقدت جزءا منك كيف لا? مشاعر الخريجين بهذه المرحلة متفاوتة من شخص لاخر منهم من يسعد كثيرا لانتهاء هذه المرحلة ومنهم من يشعر بالوحدة والالم والحزن والحنين .... كل هذا وأكثر سيزول مع مرور الوقت ... ستنسى اسماء بعض المواد اللتي زرعت الشيب في راسك .... صدق او لا تصدق ستنسى أسماء بعض الدكاترة الذين شكلوا لك رعبا في يوم من الايام ... لا داعي للحزن لانك ستتخطى هذه المرحلة فالحياة عبارة عن لقاء وفراق ..أحداث تلك المرحلة ستبقى في ذاكرتك وستسعدك في أحيان كثيرة .... ستجد نفسك تبتسمك لوحدك كثيرا عندما يبرق براسك ذكريات لك ولاصدقائك في فترة الجامعة :)

**** يقولون ان الاحزان تأتي جمعاء ... والافراح كذلك .. علفكرة وفرص العمل أيضا !!! ... سيمر عليك أيام واسابيع .. ربما اشهر بدون أي بارقة أمل لحصولك على أي وظيفة وعندما يتصل بك أحدهم بخصوص وظيفة ما... ستنهال عليك عروض العمل "سبحان الله!" وحينها ستقع في حيرة كبيرة وستعيش دور "بدك تحيروا خيروا "
اذا طرح عليك أكثر من فرصة عمل أيها تقبل؟؟ هذه شيء يعود لك! ولا تنسى انه يجب عليك أن تنظر لعدة عوامل مثل :

-مكان العمل قريب على سكني أم لا؟ هل اسستطيع ان اتكيف في حالة اضطررت لأخذ سكن قريب من عملي؟
-طبيعة العمل ؟ التكنولوجيا المستخدمة؟ هل أحب هذه التخصص بالعمل؟
-امكانية والتعلم و التطور و الارتقاء بالسلم الوظيفي؟
- الراتب
-الراحة النفسية والاحترام (هل يقدرونني ) ام انا بنظرهم آلة لحصد الاموال
-ميزات اخرى كالتامين الصحي و العلاوات وغيرها

أخواني اخواتي .... ستضطر لأخذ بعض القرارات المصيرية لوحدك ... لا تتردد باستشارة ذوي الخبرة لكن لا تدعهم أبدا يقررون عنك ...
كل شخص لديه تجارب مختلفة مع اشخاص مختلفين ليس هناك اي داعي لكي تتبنى وجهات نظرهم هم ... كن سيد قرارك وخذه بدقة وعناية
اتمنى لكم حياة سعيدة هانئة و وظائف رائعة تكون خطوة اولى في سلم النجاح والابداع 

أنا تخرجت Now What !?

أنا آية صوفان خريجة هندسة حاسوب من جامعة النجاح الوطنية - نابلس 2012 أعمل حاليا ك Quality Assurance Engineer في رام الله.
تخرجت في 23 أيار وتوظفت في 10 حزيران بعد ما  قدمت لأكتر من عشرين شركة و قمت بعمل امتحانات توظيف ومقابلات في أكتر من عشر شركات و من هنا وجب عليي أن انقل تجربتي الصغيرة جدا جدا للخريجين الجدد ..لانني وفي مثل هذا الوقت من العام الماضي كنت بحاجة لمثل هذه النصائح:

أول شي يا عزيزي المهندس عزيزتي المهندسة لما حضرتك تتخرج وحتى قبل ما تتخرج لازم تبلش تقدم لوظيفة ..
قاعدة رقم واحد:
 "انت بدك تبحث عن الوظيفة مش هي اللي بدها تبحث عنك" وهاد معناه انه أنت اذا معني بوظيفة بهالبلد بدك تجيب ليست بكل الشركات اللي بتوظف مهندسين حاسوب وبلش ابعتلهم وحدة وحدة ... في شركات بكون الها مواقع وبتم التقديم للوظيفة من خلال موقعهم وفي شركات من خلال ايميل خاص عندهم بالتوظيف ..(هلا أنت كمواطن بدك تسال حالك سؤال انت وين بدك تشتغل؟ في ناس بكونوا معنيين بمدينة معنية ف الله بعينك جوجل سيرتش صغير دور على اسماء كل الشركات و ادخل على مواقعهم وروح على قسم التوظيف وشوف كيف ممكن تقدملهم) قدم لهاي الشركات حتى لو همي مش طالبين وظيفة هاد رايي الشخصي المحض , بس دير بالك تذكر اسماء الشركات لانه زي ما صارت معي من كتر ما قدمت لشركات صارت الشركة تتصل فيي وتعرفني على نفسها ولسان حالي بسالهم : انتو متاكدين انه انا قدمتلكم؟ ممكن تعرفوني على نفسكم اكتر ههههههههههه.

القاعدة التانية:
 يا بطل وبطلة الديجتال لازم تكونوا كاتبين سيرتكم الذاتية بطريقة احترافية ومرتبة يعني اللي بمسكها عشان يقرأها, يصل اله انطباع انه صاحب السيرة الذاتية واحد بفهم ومش رح اضيع وقتي معاه اذا استدعيته لمقابلة : وهذا يتطلب انه سيرتك الذاتية تكون بتحوي على تعريف عنك وعلى المشاريع اللي اشتغلت عليها و الاماكن اللي تدربت فيها وانجازاتك ومهاراتك والدورات اللي اخدتها والجوائز اللي بتفتخر فيها ... لازم يكون الك Theme خاص لل C.V زي ما بيقولها لمستك الخاصة تكون حاضرة فيها :))

القاعدة الثالثة :
لما يتم استدعائك لمقابلة حاول احضر قبل بوقت بتلت ساعة "لا تعمل زيي في اول مقابلة الي بالتاريخ رحت متأخرة نص ساعة لانها كانت بمدينة غير مدينتي , وكنت مش مفطرة و وصلت وجهي زي الليمونة.. مش ناقصك :D" بترتب حالك وبتلبس لبس رسمي ... عزيزتي البنت بلاها الالوان الصارخة و الفل ميكب و الدناديش والاكسسوارات جماعتنا اصحاب الشركات غالبا بكونوا معنيين بالناس المحترفين العمليين :)
هلا نيجي للاشي الصعب بدك تكون متحضر للمقابلة وهذا يتطلب منك التالي:
1- لازم تعرف انت رايح تقابل على اي وظيفة "البوزشن" يعني وظيفة نتويرك ولا برمجة و و لا Testing ولا ايش عشان تتصور نوعية الاسئلة اللي رح تنسأل عنها "مرات الشركات بتوخد كمية موظفين ولاحقا بتقوم بفرزهم وتوزيعهم على التيمز المختلفة فما رح تعرف شو رح تشتغل الا بعد ما توقع العقد"
2- لازم تعرف معلومات عن الشركة "غير عنوانها طبعا عشان ما تقعد ساعة وانت بتلف وبتدور عليها زي ما صار معي باحدى الشركات :D" لازم تعرف هاي الشركة شو بتشتغل بشو متخصصة شو المشاريع اللي شغالة عليها والذي منه .

3-عشان بعض الشركات اذا مش اغلبها بتنتهج سياسة انها تعمل الك امتحان كتابي بالاول وبناء عليه بتستدعيك لمقابلة شخصية عشان هيك بدك تعمل مراجعة عامة للاشياء اللي اخدتها وانت طالب وصدقني مواد سنة تانية وتالتة أهمهما . رح اذكر شو هو المواضيع اللي رح تنسال عنها صبركم عليي

4- وقت المقابلة حط براسك اشي واحد همي مش معنيين بالجواب الصح قد ما همي معنيين يشوفو شخصيتك ...( دائما حضر فقرة تعريفية عن نفسك وغالبا بطلبوا منك تعرف عن نفسك بالانجليزي) بعدين ببلشوا يسألوك اسئلة جزء منها تقني اله علاقة بتخصصك وجزء منها اسئلة ذكاء متنوعة عشان يقيسوا طريقة تفكيرك و تحليلك للامور كيف.

هلا السؤال المعتاد من كل حد رايح يقابل "شو بدهم يسالوني؟"

بعد عدة مقابلات -اكتر من عشر- شركات صار الواحد خبرة فرح احطكم بصورة المقابلة :
أولا رح يرحبوا فيك ويشكروك على قدومك ويعرفوك على انفسهم غالبا يعني رح يكون بالمقابلة 3 اشخاص وانت يا حزين لحالك بينهم بتحسهم رح يفترسوك هع بمزح ... اغلب اللي بقابلوا ناس أمامير وطيوبين وكل ما كانو بروفيشنالز اكتر بكون تعاملهم أحسن لانه مارر عليهم بلاوي سودا فهمي مش معنيين يخوفوك بالعكس "بالعادة انت بتكون عدو نفسك الاكبر لما تخاف وترتبك وويتهيألك انك رح تخبص" بالاغلب رح تلاقي حد بضل يبتسملك و يحاول يشعرك بالامان و في واحد بيكون مش عاجبه العجب وبحاول يضغط عليك ويغلطك :) عادي عادي :)
المهم بعد ما يعرفوك عن انفسهم حاول ابتسملهم وقولهم تشرفنا "تلتخمش,, تلحلح" رح يطلبوا منك تعرفهم بنفسك وبالانجليزي  زي ما قلتلكم من شوي مرات بسالوك بعد تلات سنين وين بتشوف حالك ؟ وشو طموحك بالحياة؟

نيجي للاسئلة التقنية : Never Ever تروح تقابل وانت مش مراجع اوبجيكت اورينتد  هاي الف باء المقابلات شو هو *الابستراكت والانترفيس وشو الفرق بينهم شو ه الانهريتانس مدري شو وكل سلطات الاوبجيكت اورينتد رح اررفقلكم توتريال عظيمة لازم تقراها قبل ما تقابل هاي بتلخص كل الحفلة تبعت الاوبجيكت اورينتد http://docs.oracle.com/javase/tutorial/java/TOC.html

*ممكن يسالوك اشي بالنتويرك ال TCP & UDP و أشياء الها علاقة بال Client & Server وهالقصص 
*ممكن تنسال عن اشياء اخدناها بالاو اس زي ال Threads & Processes 
صحيح ومن اكتر الاسئلة الشائعة اسئلة الها علاقة بال Trees ,Stack , Queue and Link list
ضروري تمر عليهم
*كمان رح تنسال عن مشاريعك التخرج بشيء من التفصيل الممل و بهتموا بالجزء اللي انت اشتغلته 
*في كمان فقرة اسئلة بتكون اسئلة ذكاء وحزازير هاي أنا بكيف عليها يعني رح تنسال IQ & Puzzle
هون بهتموا يشوفو كيف بتحلل وبتفكر ... اوعك تستحي تسالهم أسئلة بالعكس لما يجيك سؤال مش عارفه اسالهم عن النقطة اللي مش فاهمها وهيك! و بلش حلل بالمسالة لمعطيات ومطاليب وحاول قسم المشكلة وحل جزء جزء ممكن يعطوك قلم ويقولولك اكتب على اللوح لا تتوتر بالعكس خد راحتك و وقتك 

أخيرا حط بدماغك اشي واحد انه الرزق على الله واذا الك نصيب بشغلة رح توخدها.. أوثق بربك ثم بحالك و حضر حالك مزبوط وحتى لو تم رفضك مرة ومرتين وتلات واربعة عادي كلنا على هالطريق بالاخر رح تلاقي الوظيفة اللي بتعجبك انت و بتناسبك ... وبعدين اغلب الشركات بتكون معنية بالفريش وعارفة انو ما عندهم خبرة فبدربوه وبعطوه راتب على قده :)

الف مبارك لكل الخريجين ان شاء الله بتلاقوا الوظائف اللي بتحلموا فيها واتمنى أن أكون ساعدت ولو بالقليل بمساعدتكم  .. نلتقي بتدوينة تانية الها علاقة بالوظائف وقبولها :)\

اختكم آية صوفان